66

سعودی عرب : مریضوں کی عیادت کرنے والوں کیلئے نئے احکامات جاری

ویب ڈیسک 22 مئی 2021

ریاض : (الشامی نیوز آن لائن نیوز) اب اپنے پیاروں کی عیادت کیلئے جانے والوں کو بھی حکومتی ہدایات پر عمل کرنا ہوگا، اسپتال میں داخل مریض سے وہی شخص مل سکے گا جس کی کورونا ویکسی نیشن ہوچکی ہوگی۔

سعودی عرب میں محکمہ صحت جدہ نے کہا ہے کہ ہسپتالوں میں زیر علاج مریضوں سے ملنے کے لیے آنے والوں پر نئی پابندی لگائی گئی ہے۔ کورونا ویکسین لگوانے والے ہی مریضوں سے ملاقات کے لیے ہسپتال آسکیں گے۔

سعودی ذرائع ابلاغ کے مطابق جدہ محکمہ صحت نے بیان میں کہا کہ سرکاری اسپتالوں کے انتہائی نگہداشت کے شعبوں اور جنرل وارڈ میں زیر علاج مریضوں سے صرف وہی شہری اور مقیم غیرملکی ملاقات کرسکیں گے جو کورونا ویکسین لے چکے ہوں گے۔

ترجمان محکمہ صحت کا کہنا ہے کہ یہ فیصلہ سب کی صحت و سلامتی کی خاطر کیا گیا ہے جبکہ اس کا دوسرا بڑا مقصد کورونا وائرس کو پھیلنے سے روکنے کے انتظامات کا معیار بلند کرنا ہے۔

یاد رہے کہ مملکت میں گزشتہ 24 گھنٹے کے دوران کورونا کے مزید 11 سو 36 کیسز کی تصدیق ہوئی ہے جبکہ ایک ہی دن میں اس مہلک وائرس سے 10 افراد ہلاک ہوئے۔

وزارت صحت کی جانب سے جمعہ 21 مئی کو جاری بیان میں کہا گیا کہ ایک ہی دن میں کورونا سے 980 افراد صحت یاب ہوئے جس کے بعد اب تک اس مرض شفایاب ہونے والوں کی مجموعی تعداد 4 لاکھ 22 ہزار 706 تک پہنچ گئی ہے۔

اس خبر پر اپنی رائے کا اظہار کریں

اپنا تبصرہ بھیجیں