50

چیمپئن کراچی کنگز کے کوچنگ اسٹاف میں ایک اور کنگ کا اضافہ

کراچی: (الشامی نیوز) چیمپئن کراچی کنگز کے کوچنگ اسٹاف میں ایک اور کنگز کا اضافہ ہوا ہے، یواے ای کے سابق ہیڈکوچ ڈگی براؤن کراچی کنگز کےاسسٹنٹ کوچ مقرر کردئیے گئے ہیں۔

تفصیلات کے مطابق سابق یواے ای ہیڈ کوچ ڈگی براؤن کراچی کنگز کے اسسٹنٹ کوچ مقرر کردئیے گئے ہیں، ڈگی براؤن پی ایس ایل6 میں کراچی کنگز کی شان بڑھائیں گے۔

براؤن نے 1997 میں انگلینڈ کے لئے ون ڈے ڈیبیو کیا تھا۔

ہرشل گبز کراچی کنگز کے نئے ہیڈ کوچ مقرر

اس سے قبل رواں ماہ دو جنوری کو سابق جنوبی افریقی کھلاڑی ہرشل گبز کراچی کنگزکے نئے ہیڈ کوچ مقرر کئے گئے تھے، کراچی کنگز کے ہیڈ کوچ ڈین جونز کے انتقال پر ہرشل گبز کوذمےداریاں دی گئیں تھیں۔

ہرشل گبز نےجنوبی افریقہ کیلئے90ٹیسٹ،248ون ڈے،23ٹی ٹوئنٹی کھیلے، دائیں ہاتھ سے بیٹنگ کرنے والے ہرشل گبز نےون ڈےمیں8094،ٹیسٹ میں6167،ٹی ٹوئنٹی میں400رنزبنا رکھے ہیں، یہی نہیں سابق جنوبی افریقی اوپنر مختلف لیگز میں کوچنگ کا تجربہ رکھتےہیں۔ہرشل گبزنے 14سال انٹرنیشنل کرکٹ میں جنوبی افریقہ کی نمائندگی کی،وہ عالمی کرکٹ میں ایک اوور میں 6چھکے لگانے والے دنیا پہلےکھلاڑی ہیں، اس کے علاوہ انہوں نے جنوبی افریقہ کیلئے بلےبازی، فیلڈنگ میں کئی بہترین پرفارمنس دیں،ہرشل گبز نےسری لنکن لیگ میں بھی کوچنگ کےفرائض انجام دیئے ہیں۔

ہرشل گبز نے 12 مارچ 2006 کو آسٹریلیا کے خلاف میچ میں کیریئر بیسٹ 175 رنز اسکور کرکے جنوبی افریقہ کو تاریخ رقم کرنے میں مدد فراہم کی تھی، اس مقابلے میں پروٹیز نے 438 رنز کا ریکارڈ ہدف حاصل کیا تھا، گبز نے کپتان گریم اسمتھ کے 187 رنز کی شراکت بھی بنائی تھی۔

واضح رہے کہ گذشتہ سال چوبیس دسمبر کو سابق آسٹریلوی کرکٹر اور کراچی کنگز کے ہیڈ کوچ ڈین جونز ممبئی میں دل کا دورہ پڑنے سے انتقال کرگئے تھے، سابق آسٹریلوی کرکٹر ڈین جونز کی عمر 59سال تھی، وہ 24مارچ 1961 میں میلبرن میں پیدا ہوئے ،ڈین جونز 1987 کا ورلڈ کپ جیتنے والی آسٹریلوی ٹیم کے اہم رکن تھے، ڈین جونز نے اپنے کرکٹ کیریئر میں 52ٹیسٹ اور164ون ڈے میں آسٹریلیا ٹیم کی نمائندگی کی۔

اس خبر پر اپنی رائے کا اظہار کریں

اپنا تبصرہ بھیجیں