59

سینئر رہنما ایم کیو ایم عامرخان کا کرونا ٹیسٹ مثبت آگیا

کراچی: متحدہ قومی موومنٹ (ایم کیو ایم) پاکستان کے سینئر رہنما عامرخان کا کرونا ٹیسٹ بھی مثبت آگیا ہے۔

تفصیلات کے مطابق ایم کیو ایم سینئر رہنما عامرخان کرونا سے متاثر ہوئے ہیں، عامر خان نے علامات محسوس ہونےپر کروناٹیسٹ کرایا تھا، جس کی رپورٹ مثبت آگئی ہے۔

کرونا کی ٹیسٹ مثبت آنے پر ایم کیو ایم رہنما نے خود کو قرنطینہ کرلیا ہے، عامر خان نے کارکنا ن اور عوام سے دعاؤں کی اپیل کی ہے۔

گذشتہ روز پیپلزپارٹی کے رکن قومی اسمبلی پیر نور محمد جیلانی کرونا کے باعث انتقال کرگئے تھے ، پیر نور محمد جیلانی کووڈ کے باعث کراچی کے نجی اسپتال میں زیر علاج تھے۔اس سے قبل اکیس دسمبر کو مسلم لیگ نواز کی سینیٹر محترمہ کلثوم پروین بھی کرونا وائرس کے باعث انتقال کرگئیں تھیں، سینیٹر کلثوم پروین گزشتہ گئی ہفتے سے کرونا وائرس کا شکار تھیں۔

سترہ دسمبر کو سینئرصحافی طارق محمود بھی کرونا کے باعث انتقال کرگئے تھے۔

دس دسمبر کو وزیراعلیٰ سندھ سید مراد علی شاہ کے مشیر اعجاز شاہ شیرازی بھی کرونا وائرس کے باعث انتقال کرگئے تھے۔

اس سے قبل چودہ نومبر کو نجی ٹی وی سے وابستہ سینئر صحافی ارشد وحید چوہدری بھی کرونا کے باعث انتقال کرگئے تھے، ارشد وحید چوہدری نیشنل پریس کلب کےسینئر نائب صدر بھی تھے۔

رواں سال نومبر میں سابق صوبائی وزیر اور ایم کیو ایم رابطہ کمیٹی کے سابق رکن عادل صدیقی کرونا کے باعث نجی اسپتال میں انتقال کر گئے تھے۔

بارہ نومبر کو چیف جسٹس پشاور ہائیکورٹ جسٹس وقار احمد سیٹھ علالت کے باعث انتقال کرگئے تھے، اسی روز سابق وزیر اعظم راجہ پرویز اشرف بھی کرونا وائرس میں مبتلا ہوئے تھے، راجہ پرویز اشرف کے کوویڈ 19 میں مبتلا ہونے کی تصدیق ان کے صاحبزادے نے ٹوئٹ کے ذریعے کی جو بعد ازاں کرونا وبا کو شکست دینے میں کامیاب ہوگئے تھے۔

پاکستان میں اس وقت کرونا وبا کی دوسری لہر شدت کے ساتھ جاری ہے، عالمی وبا میں مبتلا ہوکر کئی سیاستدان، مذہبی رہنما اس دنیا سے کوچ کرگئے ہیں۔

اس خبر پر اپنی رائے کا اظہار کریں

اپنا تبصرہ بھیجیں